عن ابطال الصفوف الاماميه بين اروقه المستشفيات والعمليات

كتب : هالة صفوت

الاسم : احمد عاطف

السن : 19 سنه

التهمه : ثائر

الاصابه : رصاصتين احدهما اخترقت الجسم وخرجت والاخري استقرت بجانب العمود الفقري

في احد المقالات السابقه لي بتاريخ 29 ديسمبر, 2011 اتكلمت عن البطل احمد

“خرجت انا والصحبه اللي معايا علشان نشوف المصاب البطل “أحمد عاطف” احمد واخد رصاصتين واحده اخترقت جسمه وخرجت والتانيه مستقره جنب العمود الفقري واللي ثبت انه “رصاص ميري 9 ملي” وسالت نفسي تاني “ليه واحد يضرب رصاصه واتنين علي نفس الشخص الا لو كان عايز ياخد روحه؟ ” وفوجئت باحمد وهو بيتكلم عن اللي حصله لما راح مستشفي المنيره اول متصاب قالي احمد انه تم خياطه الجرح مطرح الرصاصه اللي خرجت بعد عمل اشعه له والدكتور اداله “خروج” خيط جرحه مطرح “الرصاص” وقاله “انت تمام كده روح” علشان يروح بيتهم يموت مش فاهمه انا!! وبعد ماخرج جاله دكتور الاشعه قاله ياحمد روح علي مستشفي القصر العيني الاشعه شكلها مايطمنش وطبعا ابتدي احمد يطلع دم من فمه وفهم ان في حاجه جوه جسمه غلط , واتجه بيه صحابه علي مستشي القصر العيني واللي شافه “دكتور” مستشفي المنيره تمام كده ويستاهل احمد يروح علشانه شافه “استشاري” بمستشفي القصر العيني صعب يتعالج في مصر , احمد لحد دلوقتي عمل 9 عمليات في جسمه لعلاج ماخترقته الرصاصه الاولنيه بس وهيعمل العاشره في كليته يوم السبت وهيسافر لالمانيا علشان يستكمل علاجه وكل العلاج ده شافه دكتور مستشفي المنيره انه حاجه بسيطه وكتبله علي خروج .”

بعد كميه الاهمال اللي حصل للبطل ده الا وانه صامد حتي الان .. النهارده دلوقتي وانا بكتبلكم هو داخل غرفه العمليات للعمليه ال 12 له علشان بس يعالج اثر اول طلقه اللي طلعت من جسمه .

ابطالنا اللي كانوا دايما بيحمونا منهم اللي مات واللي عاش بين اروقه المستشفيات وغرف العمليات فلا نملك الا العجز لمساعدتهم بعد ان تخلت الحكومه تماما ونهائيا عن مساعدتهم او حتي محاوله معرفه مين السبب فاللي حصلهم .. يمكن علشان هي المتهمه الاولي .