الحمد لله أنا ( و أعوذ بالله من كلمة أنا ) باكتب شعر , و في واحد صاحبي شاف شعري و قالي أحطه عالبلوج , المهم دي أول قصيدة
أنشرها والناس تقراها مش أول قصيدة أكتبها , ما علينا
أحب بس أوضح ان القصيدة دي كتبتها يوم 11/ 9 بعد ما تم تمديد قانون الطوارئ , و اعتذار المشير عن الشهادة , فيا ريت الناس تقدر التيييييييييييييييييييييت اللي أنا كنت حاسه
انا رجعت في قراراتي
وبطالب الرئيس بالرجوع
مزقت كتبي وكراساتي
علشان فشلت في المجموع
حتفيد بايه بس شهاداتي
طالما هو نفس الموضوع
و ايه اللي اتغيرفي حياتي
ما هو نفس الذل والخضوع
ايام حسني زي ايام حسانين
هو نفس الشقي والجوع
لو هو نفس نظام الاتنين
علي ايه نغير في الاسبوع
واحنا حنشوف الفرح فين
طالما العيون مليانه دموع
يا ريتها الثورة ما قامت
ولا المخفي كان مخلوع
الفرحة لا تمت ولا دامت
و ملحقناش نطفي الشموع
البلد بعدما جاعت وصامت
جات تفطر قالولها ممنوع
وفي نفس مشاكلها عامت
صوتها برضه مش مسموع
من يوم ما دخان الثورة اندلع
الشعب لساه مهموم وموجوع
بلا ثورات بلا محاكمة ودلع
لوالاصل فسد باظت الفروع
من الفراعنة وحتي اللي اتخلع
الشعب في بطن حكامه مبلوع
حكام بالكراس ليها شغف وولع
وشعب غلبان في البلا منقوع
ليست هناك تعليقات:
إرسال تعليق