جيفارا النيل
جيفارا مات ، جيفارا مات
بس اللي قدامي ده مش جيفارا
ده مصاب ، و راقد في قصر الدوبارة
و العصابة اللي على عينه تشهد
انه استحق لقب بطل و عن جدارة
أحمد حرارة
****
جيفارا مات
كان عظيم ، بس مات
على مدفعه جوه الغابات
لكن بطلنا حي ، و واقف ثبات
لأجل كرامته ...ثار
و زاحت خطوته تولع شرار
ده مناضل ... ومن غير سلاح
صورته عالشاشة تصرخ
حيّ على الفلاح
حيّ على الكفاح
علاء عبد الفتاح
****
جيفارا مات
لكن دماه لسه بتجري في عروقنا
دلوقتي .... فوقنا
و حسينا بنور الشمس فوقنا
يسطع على الوادي
في كل شبر و حتة في بلادي يقول :
يا نيــــل
يا أبو الضحكة و المواويل
إزاي راضي بنص حرية
يمكن جيفارا مات
لكن ألاف سمرة غيره جاية
ضحك عليك الزمان
استغفلك و فهمك
إني شعب .... جبان
لآ .... أنا يمكن راقد في زنزانة
لكن صدق اللي قال السجن للجدعان
ده أنا سجين بضحكته ...
يقهر السجان
سجنه يشجع رفقته
نور الملايكه في صحبته
و الشمس تشرق من ورا القضبان
و الشمس تشرق من ورا القضبان ............
ليست هناك تعليقات:
إرسال تعليق