يا عسكري !
يا كل عايش ....و كل شاري
و كل قاري ... و كل سامعي
اسمع و عي
أنا مش جيفارا ولا عمري هبقى
و لا حتى في يوم كنت أنتوي
أنا بس انسان ... شم قنابل الدخان
و انتشى
و كمان خدتلي كام رصاصة في الحشا
ولا قلت وقف
وشايف مينا
طاير في الميدان .. شايل علم الحرية
بيرفرف
يا عسكري ، ياللي واقف في أول الصف
بصلي و قلي
لو لاقي تاكل
قوم
.. نشنّ .. و اضرب
مع كل شهيد بيروح .... الصبح بيقرب
و أصل أنا مخترتش أبقى حي
أيوة مخترتش أبقى حي
ده أنا اللي كل يوم
بقوم مالنوم و بقول عالاستشهاد
حي
و بصراحة
كل اللي راحوا
علاء , خالد و سالي ,محمد و مينا
مهما اعتصمنا , و اتضربنا و اتئذينا
بردوا ليهم و حشة
و الفرقة وحشه
و هي طلقة ... تجمعنا في الجنة
أحمد .... و حنا
و لا حد يوم يقدر يفرق ما بيننا
*****
ترابك يا مصر
لسة مشبعش بدمايا
و دمع الأمهات على موت ضناهم
خلاص نشف بكايا
و نزيف الشهدا سيال
كما شلال
نوره يشع جوايا يهد جبال
يحرك قلمي .... يكتب عالورق قصايد
بحبر أقوى من الرصاص
ينطلق في وش الطبنجة يقول
قصاص
يا سيّدي القناص
أنا هو واقف
و صدري مكشوف
انزل و شوف الوشوش
مفيش أي لمحة لأي خوف
انزل و شوف الوشوش
تعرف بحق يعني ايه
مصر ولادة
يا عسكري , تعالا و دوس عليا بالبيادة
يطلع بدالي بدل المية ألف
تقسم بترابك يا مصر
عالشهادة.
ليست هناك تعليقات:
إرسال تعليق